یاری.....هۆنراوە بۆ منداڵان...عەلی حەمەڕەشید

یاری

هۆنراوەی:عەلی حەمەڕەشید

.

یارییە ھەی یــــــــارییە

بۆ منداڵان دیــــــــارییە

جێگەی یاری بە جـارێ

ھەر خۆشی لێ دەبارێ

لەو شوێنەی یاری تیایە

پێکــــــــــەنین و قاقایە

ئەوەتانێ لـــــــەم شوێنە

وا یــــاریی خەت خەتێنە

سەیری خەتیان کێشـاوە

بەردێکیــــان تیا داناوە

لە ناو خانەکـــــــــانیدا

ژمــــارەی تیا نوســـراوە

کە نۆرەی ھەر کەسێک بێ

پێویستە ڕێک و پێک بێ

بەردەکە خــانە خــــــانە

بــەرە و پێش بات ژیرانە

ئەو کەسەی کــــە وریایە

ڕێزی ھـــــاوڕێی لە لایە

بۆ ئەوەی خۆشیی یاری

بیبات بەرە و بەختیاری

....